Fota: čat «Briest — Tieriespol»
«Katłoŭka». Situacyja na adnym z samych papularnych u biełarusaŭ napramkaŭ zastajecca krytyčna składanaj apošnija niekalki dzion. U čerhach stajać sotni mašyn, rejsavyja aŭtobusy taksama prychodziać z zatrymkaj. Pa słovach vidavočcaŭ, pramarudžvańnie źviazana ź mierami kantrolu na biełaruskim baku:
«Vuzkaje miesca — biełaruskaja mytnia, i mienavita na joj stvarajecca zator. I reč nie ŭ tym, što pamiežniki pracujuć marudna. Prosta jany patrabujuć vyhružać rečy z mašyn, što na «zialonym», što na «čyrvonym» kanale, i staranna hladziać kožnuju sumku i kožny čamadan», — dzielicca infarmacyjaj adzin z kiroŭcaŭ.
Tak, kab apynucca kala litoŭskaha «šłahbauma», lehkavym aŭtamabilam zaraz patrebna bolš za 30 hadzin. Padrychtavacca da doŭhaha stajańnia daviadziecca i tym, chto choča viarnucca ŭ Biełaruś. Čas čakańnia na ŭjezd u hetym punkcie — kala 40 hadzin.
«Kamienny Łoh». 23 śniežnia siaredni čas pierasiačeńnia litoŭskaj miažy z hetaha napramku składaŭ kala 30 hadzin, ale pik zatrymak pryjšoŭsia na nastupny dzień — tady termin čakańnia pavialičyŭsia amal udvaja.
Na viečar paniadziełka situacyja pa-raniejšamu zastajecca napružanaj: čarha z aŭtamabilaŭ na vyjezd z krainy raściahnułasia bolš čym na try kiłamietry — mašyny stajać pa 40 hadzin.
Pasažyry dzielacca, što zatory — praz pracu litoŭskich pamiežnikaŭ (biełaruskich prachodziać chutka).
Z-za doŭhaha prastoju niekatorym aŭtamabilistam stanovicca drenna. U čacie šukajuć haračkapanižalnyja preparaty i supraćprastudnyja miedykamienty.
«Pryvałka». Jak nam daviałosia daviedacca, situacyja na «Pryvałcy» zastajecca samaj składanaj. Pa stanie na viečar 25 śniežnia, čarha na hetym punkcie składała bolš za 240 mašyn, a termin čakańnia — bolš za 50 hadzin.
Ludzi šukajuć ciopłuju ježu i mahčymaść prajści miažu chutčej.
«Brest». Surjoznyja zatrymki na polskim napramku taksama pačalisia jašče 23 śniežnia — siaredni čas pierasiačeńnia miažy na toj momant składaŭ 45 hadzin. Napružanym zastavaŭsia i nastupny dzień — achvotnyja pakinuć Biełaruś praviali ŭ čarzie kala 1,5 sutak. Kab paskoryć pracu pamiežnikaŭ, niekatoryja kiroŭcy stali sihnalić. Infarmacyi pra toje, ci paŭpłyvała heta na chutkaść ruchu transpartu, pakul niama.
Situacyja krychu palepšała 25 śniežnia — čas vyjezdu z krainy skaraciŭsia da 20 hadzin.
«Hryharoŭščyna». Nie stała vyklučeńniem i miaža z Łatvijaj — jana taksama pierahružana. Chacia spravy na Hryharoŭščynie iduć krychu lepš, čym na astatnich napramkach, u viečar paniadziełka na vyjezd ź Biełarusi tut vystraiłasia 150 aŭtamabilaŭ, a siaredniaja chutkaść prachodžańnia składała kala 18 hadzin.
Vializnyja čerhi na miažy ažyvili śpiekulantaŭ: jany hatovy pradać zapavietnaje miesca pobač z KPP. Ceny na takuju pasłuhu adroźnivajucca ŭ zaležnaści ad kankretnaha punkta propusku i varjirujucca ad 300 da 500 jeŭra.
Situacyja na miežach mianiajecca kožnuju hadzinu. Płanujučy pajezdku ŭ bližejšyja dni, praviarajcie infarmacyju ŭ čatach aŭtamabilistaŭ ci na haračaj linii pahrankamiteta Biełarusi.
