Фота: Photo by Bruce Bennett / Getty Images
Канцэрн Boeing рэкамендаваў авіякампаніям праверыць крэслы ў кабіне пілотаў самалётаў 787 Dreamliner пасля інцыдэнту з лайнерам чылійскай авіякампаніі Latam, які рэзка страціў вышыню падчас палёту з Аўстраліі ў Новую Зеландыю, піша Бі-бі-сі.
У панядзелак самалёт, які выконваў рэйс LA800 з аўстралійскага Сіднэя ў новазеландскі Окленд, падчас палёту «праваліўся» на 100 метраў, у выніку чаго 50 чалавек атрымалі траўмы. 12 чалавек, у тым ліку тры члены экіпажа, трапілі ў бальніцу.
Паведамлялася, што страта вышыні адбылася з-за некаторых тэхнічных праблем. Расследаванне яшчэ працягваецца.
Раней выданне Wall Street Journal са спасылкай на крыніцы паведаміла, што па адной з версій, прычынай мог стаць усталяваны ў спінцы крэсла пілотаў перамыкач, які заклініла.
Па звестках WSJ, член экіпажа (бортправаднік або бортправадніца), які падаваў ежу пілотам, выпадкова закрануў перамыкач, які забяспечвае электрарэгулёўку сядзенняў. У выніку перамыкач заклініла, а крэсла прасунулася наперад, штурхнуўшы пілота на штурвал.
Суразмоўца выдання спасылаецца на крыніцы, якія знаёмыя з папярэднімі вынікамі расследавання.
Па даных WSJ, у чацвер кампанія Boeing разаслала авіякампаніям, якія эксплуатуюць самалёты Dreamliner, памятку, і рэкамендавала праверыць працу крэслаў.
У Boeing заявілі, што разглядаюць магчымасць унясення змяненняў у інструкцыю па эксплуатацыі самалёта.
Матарызаваныя крэслы Boeing 787 і іншых сучасных пасажырскіх лайнераў распрацаваны так, каб пілоты маглі свабодна перасоўвацца ўнутры цеснай кабіны.
«Гэта падобна на сядзенне ў вашай машыне: калі б яны раптам пачалі рухацца самі па сабе праз перамыкач, які заклініла, што б вы зрабілі?»— кажа кансультант па авіяцыйнай бяспецы і пілот Джон Кокс, падкрэсліваючы, што не чуў пра падобныя выпадкі раней.
Раней два следчыя з чылійскага ўпраўлення грамадзянскай авіяцыі прыбылі ў Новую Зеландыю, каб узяць удзел у расследаванні. У ім таксама ўдзельнічаюць прадстаўнікі Latam Airlines.
Падчас інцыдэнту пасажыраў, якія не былі прышпіленыя, рэзка падкінула ў паветра. Некалькі чалавек атрымалі траўмы галавы.
«Некаторыя сур'ёзна пацярпелі, — распавёў адзін з пасажыраў. — Людзі былі па-сапраўднаму напалоханыя».
У Latam Airlines паведамілі, што самалёт прызямліўся ў аэрапорце Окленда па раскладзе, і дадалі, што шкадуюць аб тым, што здарылася.
Авіякампаніі раяць пасажырам заставацца прышпіленымі рамянямі бяспекі на працягу ўсяго палёту на выпадак пазаштатных сітуацый.
Чытайце таксама:
«Белавія» вярнула магчымасць выбіраць месцы на рэйс пры анлайн-рэгістрацыі
Аэрапорт Мінск шукае «таемных пасажыраў» для маніторынгу сваіх паслуг
