Maryja Kaleśnikava ŭ lipieni 2020 hoda. Fota: «Naša Niva»
Maryja Kaleśnikava naradziłasia 24 krasavika 1982 hoda ŭ Minsku. Skončyła Biełaruskuju dziaržaŭnuju akademiju muzyki pa śpiecyjalnaści flejtyst i dyryžor. Z 17 hadoŭ vykładała flejtu ŭ himnazii ŭ Minsku. Hrała na flejcie ŭ Opiernym teatry, arkiestry Finbierha, brała ŭdzieł u moładzievym nacyjanalnym ruchu.
U 2007 hodzie Maryja Kaleśnikava pierajechała ŭ Hiermaniju. Spačatku vučyłasia ŭ Vyšejšaj škole muzyki ŭ Štutharcie, a paśla prymała ŭdzieł u kancertach, zajmałasia arhanizacyjaj mižnarodnych kulturnych prajektaŭ jak tam, tak i ŭ rodnaj krainie.
U 2017 hodzie Biełhazprambank, staršynioj praŭleńnia jakoha byŭ viadomy ŭ krainie bankir Viktar Babaryka, kupiŭ try pustyja cechi Minskaha stankabudaŭničaha zavoda. Byłyja zavadskija pamiaškańni pieraabstalavali ŭ kulturny chab — OK16. Miesca miełasia zrabicca inkubataram kulturnych prajektaŭ i ekanamičnych instrumientaŭ budučyni. Art-dyrektaram prajekta stała Maryja Kaleśnikava.
U mai 2020 h. dałučyłasia da štaba Babaryki, jaki zajaviŭ, što idzie ŭ prezidenty, paśla aryštu bankira, faktyčna stała tvaram jaho štaba, jeździła sa Śviatłanaj Cichanoŭskaj i Vieranikaj Capkała pa rehijonach.
Maryja była vykradzienaja 7 vieraśnia 2020 h. u Minsku i razam ź jašče dvuma siabrami Kaardynacyjnaj rady, Antonam Radniankovym i Ivanam Kraŭcovym, hvałtoŭna pryviezienaja na biełaruska-ŭkrainskuju miažu dla vydvareńnia z krainy. Adnak, parvaŭšy svoj pašpart na pamiežnym pierachodzie i vyskačyŭšy z aŭtamabila, Maryja Kaleśnikava viarnułasia ŭ Biełaruś.
21 śniežnia stała viadoma, što zhodna z daručeńniem Hienprakuratury Śledčy kamitet raspačaŭ kryminalnuju spravu ab zmovie z metaj zachopu ŭłady niekanstytucyjnym šlacham (č. 1 art. 357 KK) suprać siabraŭ Kaardynacyjnaj rady. Taksama Maryja Kaleśnikava stała fihurantkaj kryminalnaj spravy ab stvareńni ekstremisckaha farmiravańnia (art. 361-1 KK), taksama raspačataj suprać Kaardynacyjnaj rady.
6 vieraśnia 2021 hoda — jaje sudzili razam ź jurystam Maksimam Znakam — asudžanaja na 11 hadoŭ kałonii. Pakarańnie adbyvaje ŭ Homielskaj kałonii.
U kancy listapada 2023 hoda Maryja Kaleśnikava trapiła ŭ reanimacyju Homielskaj balnicy chutkaj dapamohi. Joj praviali ekstranuju apieracyju, vyjavili prabadnuju jazvu, jakaja ŭskładniłasia pierytanitam. Paśla balnicy ŭ chutkim časie Maryju pieraviali nazad u kałoniju, u miedyka-sanitarnuju častku. Tam joj dazvolili sustrecca z baćkam. Z taho času rodnyja nie bačyli Maryju, nie atrymlivali listoŭ i telefanavańniaŭ.
Apošni list ad Maryi Kaleśnikavaj rodnyja atrymali 15 lutaha 2023 hoda. Z taho času blizkija nie majuć pra jaje anijakaj infarmacyi. Miarkujecca, što Maryja znachodzicca ŭ pamiaškańni kamiernaha typu.
Jaje nie vodziać na pracu, jana hod izalavanaja ŭ adzinočnaj kamiery. Inšyja źniavolenyja žančyny, traplajučy ŭ ŠIZA, čuli jaje hołas, kali jana była tam i kazała achoŭnikam pra toje, što adčuvaje siabie błaha.
Čytajcie taksama:
Daviedalisia pra źniavolenych, jakija ŭ homielskaj kałonii presavali Maryju Kaleśnikavu
«Hod znachodzicca ŭ poŭnaj izalacyi». Što robicca z Maryjaj Kaleśnikavaj
