Суд у Нью-Ёрку адмяніў прысуд Харві Вайнштэйну, якога абвінавачвалі ў згвалтаванні
Суд у Нью-Ёрку прыйшоў да высновы, што прысуд, вынесены ў 2020 годзе ў дачыненні да вядомага амерыканскага кінапрадзюсера Харві Вайнштэйна, патрабуе перагляду, піша Бі-бі-сі.
25.04.2024 / 18:58
Харві Вайнштэйн. Фота: Etienne Laurent/Pool Photo via AP
У рашэнні суда сказана, што ранейшы суд над Вайнштэйнам не быў справядлівым, паколькі пракуроры прыцягвалі ў якасці сведак людзей, паказанні якіх не мелі дачынення да гэтага працэсу. Таму, на думку суда, у выніку Вайнштэйна судзілі на аснове яго папярэдніх учынкаў, а не выключна з пункту гледжання здзяйснення злачынстваў, у якіх яго абвінавачвалі падчас працэсу.
У сувязі з гэтым суд у Нью-Ёрку пастанавіў правесці па справе Вайнштэйна новае судовае разбіральніцтва.
Працэс над Вайнштэйнам быў звязаны з сэксуальным гвалтам: з 2017 года больш за 80 жанчын абвінавацілі яго ў дамаганнях, у тым ліку актрысы Эшлі Джад, Гвінет Пэлтроу, Сальма Хаек, Анджаліна Джалі і Ума Турман.
Відавочцы расказвалі, што Вайнштэйн чапляўся да актрыс у гатэльных нумарах на падставе нібыта кастынгу. Многія з іх захоўвалі маўчанне пра гэта, бо баяліся страціць месца ў кінаіндустрыі.
У 2020 годзе Вайнштэйна асудзілі да 23 гадоў пазбаўлення волі. Пасля ў ходзе новага крымінальнага працэсу ў Лос-Анджэлесе ён атрымаў яшчэ 16 гадоў турмы.
Для самога Вайнштэйна пакуль што нічога не зменіцца: праз прысуд, вынесены ў Каліфорніі, ён застанецца ў турме да далейшага паведамлення.
Што харасмент, а што не харасмент? Тлумачым
Пераасэнсаванне мужнасці: што такое быць мужчынам сёння?