Vučonyja vyjavili dziŭnuju suviaź pamiž tempieraturaj cieła i depresijaj
Karelacyja pamiž bolš vysokaj tempieraturaj cieła i ciažkimi simptomami depresii adkryvaje novyja mahčymaści jaje lačeńnia šlacham rehulacyi tempieratury.
08.02.2024 / 20:52
Fota: LordHenriVoton / Getty Images
Novaje daśledavańnie, vyniki jakoha apublikavanyja ŭ časopisie Scientific Reports, vyjaviła, što ludzi z depresijaj majuć bolš vysokuju tempieraturu cieła. Praŭda, vučonyja nie paznačajuć, depresija vyklikaje pavyšeńnie tempieratury ci naadvarot. Taksama nieviadoma, ci źjaŭlajecca bolš vysokaja tempieratura cieła ŭ ludziej z depresijaj prajavaj źnižeńnia zdolnaści arhanizmu da samaachałodžvańnia, vynikam mietabaličnych pracesaŭ ci kambinacyjaj pieršaha i druhoha.
Vučonyja praanalizavali danyja bolš za 20 tysiač udzielnikaŭ, jakija nasili pryładu, jakaja vymiaraje tempieraturu cieła, i taksama štodnia paviedamlali pra svaju tempieraturu i simptomy depresii. Siamimiesiačnaje daśledavańnie pačałosia ŭ pačatku 2020 hoda i achapiła 106 krain.
Vyniki pakazali, što z pavieličeńniem ciažkaści simptomaŭ depresii va ŭdzielnikaŭ pavyšałasia tempieratura cieła. Danyja pra tempieraturu cieła taksama pakazali tendencyju da bolš vysokich acenak depresii ŭ ludziej, čyja tempieratura mienš vahałasia na praciahu 24-hadzinnaha pieryjadu, ale hetaja zakanamiernaść nie była statystyčna značnaj.
Na dumku aŭtaraŭ, ich daśledavańnie pralivaje śviatło na toje, jak moža pracavać novy mietad lačeńnia depresii. Niekatoryja papiarednija daśledavańni pakazali, što haračyja vanny ci sauny mohuć źmienšyć depresiju. Mahčyma, heta adbyvajecca za košt stymulavańnia samaachałodžańnia, naprykład, praz potavydzialeńnie.
Taki mietad pakazaŭ bolšuju efiektyŭnaść, čym pramoje achałodžvańnie z dapamohaj, naprykład, ledzianoj vanny.
Vučonyja spadziajucca, što ŭ budučyni znojduć sposab kantrolu tempieratury cieła ludziej z depresijaj kab svoječasova pravodzić lačeńnie ciepłavymi pracedurami.
Čytajcie jašče:
«Ja sutkami lažała nieruchoma». Ščyraja historyja adnoj pieramohi nad depresijaj
Vučonyja vyjavili, što aptymisty majuć horšyja kahnityŭnyja zdolnaści
Navukoŭcy ŭździejańniem elektratoku zrabili ludziej bolš padatnymi na hipnoz