Што за гурт Nizkiz, які амаль у поўным складзе затрымалі ў Магілёве
Раніцай 6 студзеня стала вядома пра затрыманне трох удзельнікаў магілёўскага гурта Nizkiz. Сілавікі сцвярджаюць, што Аляксандр Ільін, Сяргей Кульша і Дзмітрый Халяўкін пакінулі краіну пасля 2020-га, але вырашылі вярнуцца. Расказваем, што варта ведаць пра Nizkiz — гурт, што пайшоў па слядах сумнавядомага Tor Band.
06.01.2024 / 12:36
Фота: modernrock.ru
Гурт Nizkiz складаецца з чатырох музыкантаў:
- Аляксандр Ільін (вакал, тэксты песень)
- Сяргей Кульша (бас-гітара)
- Дзмітрый Халяўкін (барабаны)
- Леанід Несцярук (гітара)
У рукі сілавікоў трапілі першыя тры музыканты. Леанід Несцярук цяпер знаходзіцца за мяжой.
Nizkiz узнік у 2008 годзе. Цікавая назва, паводле Аляксандра Ільіна, насамрэч нічога не значыць — гэта проста прыгожае спалучэнне літар. На тым этапе існавання гурт актыўна ладзіў жывыя выступы, удзельнічаў, паводле словаў Дзмітрыя Халяўкіна, ва ўсіх магчымых конкурсах і адборах.
І гэта дало свае плады — пра Nizkiz пачалі гаварыць, паступова гурт набіраў вядомасць. Да 2020-га яны выпусцілі тры альбомы, знялі шэсць кліпаў, атрымалі багата ўзнагародаў — ёсць нават прэмія «Радыё АНТ» у намінацыі «Дэбют года-2012». А яшчэ збіралі тысячныя аншлагі ў беларускіх клубах і выступалі на разагрэве ў Thiry Seconds To Mars, калі тыя прыязджалі ў Мінск.
Яшчэ адзін цікавы факт пра Nizkiz -– іх трэк «Полночь» трапіў у футбольны сімулятар FIFA оnline 4. Гэта было не пытанне грошаў, а хутчэй яшчэ адзін спосаб прасунуць сваю творчасць, ды яшчэ і прыемны — музыканты добра ставяцца да футбола.
Найбольшую вядомасць у сваёй гісторыі Nizkiz набылі ў 2020-м. Яшчэ да пачатку кавіду, у лютым таго года, магілеўчане зладзілі сольны канцэрт у Falcon Club — на той час гэта было іх найвялікшае ўласнае выступленне. А праз некалькі месяцаў, 26 чэрвеня 2020 года, гурт прадставіў моцны трэк «Правілы», створаны ў супрацоўніцтве з амерыканскім прадзюсарам Нікаласам Эсігам. А калі пачаліся маршы, Nizkiz знялі на іх кліп да «Правілаў» —– і ён стаў вельмі папулярны.
Ільін так апісваў нараджэнне «Правілаў»: «Песня стваралася даволі лёгка, бо ўсе словы, думкі і пасылы луналі ў паветры. Нам заставалася толькі агучыць гэта».
Пасля пачатку вайны Nizkiz выступілі за мір і адмянілі свае канцэрты ў Расіі. Гітарыст Леанід Несцярук (адзіны чалец гурта, які цяпер на волі) казаў тады пра гэта: «Мне здаецца, быць супраць гвалту і бязмежжа — гэта пытанне не палітыкі, а прыстойнасці і адэкватнасці».
Хлопцы выступалі ў Еўропе — напрыклад, прыязджалі ў Вільню, Берлін, даязджалі нават да Кіпра. Паводле праваабаронцаў, чальцы гурта насамрэч не з'язджалі з краіны, а працягвалі жыць у Беларусі. Выключэнне — гітарыст Леанід Несцярук. У кастрычніку 2022 ён пісаў у фэйсбуку, што нейкі час будзе жыць у Варшаве і што гатовы праводзіць прыватныя ўрокі электрагітары.
Лёс Nizkiz нагадвае гісторыю гурта Tor Band, яшчэ адных музыкаў пратэстнага часу. Музыкі з Рагачова не жадалі з'язджаць з Беларусі і трапілі пад крымінальны пераслед. У выніку Tor Band абвясцілі экстрэмісцкім фармаваннем, а 31 кастрычніка 2023-га трох музыкаў за іх песні прысудзілі да тэрмінаў ад 7,5 да 9 гадоў калоніі.
Чытайце яшчэ:
Людзі года па версіі «Нашай Нівы» — гурт Tor Band
Што слухаць па-беларуску? Топ папулярных песень у Spotify на роднай мове ПЛЭЙЛІСТ